«Արսենալի» նախկին հարձակվող Անդրեյ Արշավինը վերադարձել է իր հարազատ ակումբ` Պետերբուրգի «Զենիթ»:
2009 թվականին «զինագործները» ձեռք բերեցին Անդրեյին «Զենիթից»` 15 մլն ֆունտի դիմաց: Սակայն, այս ամառ Ռուսաստանի հավաքականի նախկին ավագը դարձավ այն 14 ֆուտբոլիստներից մեկը, ում հետ «Արսենալը» չշարունակեց համագործակցությունը:
Այս կերպ, ազատ ֆուտբոլիստի կարգավիճակով, 32-ամյա Արշավինը վերադարձավ «Զենիթ»` կնքելով երկու տարվա պայմանագիր: Սա կլինի երրորդ շրջանը, որ Անդրեյն անցկացնում է հարազատ ակումբում, քանի որ 2012 թվականին նա վարձավճարով վերադարձել էր այստեղ:
Հավելենք, որ «Արսենալում» հանդես եկած ժամանակ Արշավինը խփել է 31 գոլ, ներառյալ «Էնֆիլդում» խփաց 4 գոլերը` «Լիվերպուլի» դեմ: Ավարտված մրցաշրջանում Պրեմիեր Լիգայում Անդրեյը խաղադաշտում անցկացրել է ընդամենը 80 րոպե, իսկ միակ խփված գոլը եղել է Լիգայի գավաթի խաղարկությունում` «Քովենթրիի» դեմ (6:1):
