«Արսենալի» պաշտպան Լորան Կոսելնիի գործակալն ակնարկել է, որ ֆրանսիացի ֆուտբոլիստն այս ամռանը կարող է փոխել ակումբը:
Կոսելնին արդեն հայտնել է, որ եթե իր ակումբը չսկսի տիտղոսներ նվաճել, ապա նա կհեռանա «Արսենալից»: Եվ պատահական չէ «զինագործների» հետաքրքրությունը «Սուոնսիի» ավագ Էշլի Ուիլյամսի նկատմամբ:
Այժմ արդեն հայտնի է, որ 27-ամյա Լորանը հայտնվել է «Բավարիայի» և «Բարսելոնայի» ուշադրության կենտրոնում: Սակայն առայժմ դա միայն հետաքրքրություն է: Նշված ակումբների հետ Կոսելնին չի բանակցում:
-Հետաքրքրություն կա: Ես գիտեմ, որ Լորանը մի քանի ակումբների տրանսֆերային ցուցակում է,- ֆուտբոլիստի գործակալ Ստեֆան Կուրբիսի խոսքերն է մեջբերում The Sun-ը:
Նշենք, որ երեք տարի առաջ «Արսենալը» Կոսելնիին ձեռք բերեց 8.5 մլն ֆունտով: Նախորդ մրցաշրջանը լավագույնը ստացվեց Լորանի համար: Ֆրանսիացու տրանսֆերային արժեքն այժմ գնահատվում է 15 մլն ֆունտ: