«Մալագայի» կիսապաշտպան Իսկոն հերթական անգամ ակնարկել է «Մանչեսթեր Սիթի» տեղափոխվելու մասին` կարևորելով «քաղաքայիների» նոր մարզիչ Մանուել Պելեգրինիի աշխատանքը:
Հենց Պելեգրինիի գլխավորությամբ 21-ամյա իսպանացին բացահայտվեց իր ներկայիս ակումբում և գրավեց եվրոպական գերակումբների, այդ թվում «Սիթիի» և «Ռեալ Մադրիդի» ուշադրությունը:
«Սիթի օֆ Մանչեսթերում» վստահ են, որ մարզչի գործոնը կնպաստի Իսկոյի տեղափոխությանն Անգլիա: Ֆուտբոլիստը, ով հիմա մասնակցում է Եվրոպայի երիտասարդական առաջնությանը, դեռևս սահմանափակվում է Պելեգրինիի մասին գովեստի խոսքեր արտահայտելով:
-Նա հրաշալի մարզիչ է: Նա տպավորիչ աշխատանք է կատարել «Մալագայում» և իր նախկին ակումբներում, այնպես որ ես կասկած չունեմ, որ «Սիթիում» նա հաջողության կհասնի:
Դա այն է, ինչ ես արդեն գիտեմ Պելեգրինիի մասին: Ես գիտեմ՝ ինչպես է նա աշխատում, և հենց նա է առանցքային դեր կատարել իմ կարիերայում` 2 տարի «Մալագայում» մեր միասնական աշխատանքի ընթացքում:
Անկասկած, մեծ առավելություն է, որ ես նրան գիտեմ, սակայն դեռևս ոչ մի կոնկրետ բան չկա,- Իսկոյի խոսքերն է մեջբերում Daily Mirror-ը` հղում կատարելով իսպանական մամուլին:
