«Մանչեսթեր Յունայթեդը» պատրաստ է լսել իր ավագ Ուեյն Ռունիին մրցաշրջանի ավարտից հետո չինական ակումբին վաճառելու ձեռնտու առաջարկները։ Այս մասին հայտնում է Manchester Evening News-ը։
Ընթացիկ մրցաշրջանում, չհաշված վերջին մի քանի շաբաթները, պարզ դարձավ, որ 30-ամյա Ռունին այլևս չի կարողանում կատարել ռմբարկուական իր պարտականությունները։ Հնարավոր է՝ պատճառը անգլիացու տարիքն է, կամ ոչ բավարար աջակցությունն իր թիմակիցներից։
Աղբյուրի հաղորդմամբ, «Յունայթեդն» արդեն մի քանի տպավորիչ առաջարկ ստացել է չինական ակումբներից։ Անձամբ Ռունիի համար սա հնարավորություն է իր աշխատավարձը հասցնել շաբաթական 500 հզր ֆունտի։
Տրանսֆերային պատուհանը Չինաստանում բաց է ևս մեկ շաբաթ, սակայն «կարմիր սատանաները» Ուեյնի վաճառքի հետ կապված հարցերը կքննարկեն միայն մրցաշրջանի ավարտից հետո, եթե նրանց հաջողվի Ռունիին արժանի փոխարինող գտնել։
Ինչպես գիտենք, «Յունայթեդի» տրանսֆերային նպատակներից է համարվում Կրիշտիանու Ռոնալդուին «Օլդ Թրաֆորդ» վերադարձնելը, ինչպես նաև Նեյմարը՝ «Բարսելոնայից» և Զլատան Իբրահիմովիչը՝ ՊՍԺ-ից։ Այս հարձակվողներից որևէ մեկի տրանսֆերի դեպքում Ռունին կհայտնվի Չինաստանում։
