«Արսենալի» կիսապաշտպան Ջեկ Ուիլշերը խոստովանել է, որ իր համար տհաճ անակնկալ էր Անգլիայի ֆուտբոլի ասոցիացիայի կողմից իրեն ուղղված մեղադրանքը՝ կապված «Տոտտենհեմի» հասցեին արված վիրավորական արտահայտությունների հետ:
Հիշեցնենք, որ Անգլիայի գավաթը նվաճելուց հետո շքերթի ժամանակ Ուիլշերը բարձրախոսով վիրավորական արտահայտություններ արեց հյուսիսլոնդոնյան իրենց հարևանի հասցեին:
Նման վարքով Ջեկն աչքի էր ընկել նաև մեկ տարի առաջ, սակայն այս անգամ քննադատություններն այնքան շատ էին, որ անգամ ՖԱ-ն ներկայացրեց իր մեղադրանքը: Ուիլշերը զարմացած է իրադարձությունների նման զարգացումից:
-Ես այդ մասին իմացա, երբ միացա հավաքականին: Մամուլի աշխատողներից մեկը հայտնեց: Դա ինձ համար անակնկալ էր: Ոչինչ չգիտեի մեղադրանքի մասին, ուստի իմ արձագանքը եղավ այսպես՝ «Ի՞նչ»:
Չեմ կարծում, որ այս պահին ինձ թույլատրվում է որևէ մեկնաբանություն անել: Ես միշտ կապ եմ ունեցել «Արսենալի» երկրպագուների հետ, դեռ մանկությունից, չէ որ այս ակումբում եմ մեծացել: Ես մեծացել եմ «Արսենալում» և սիրում եմ երկրպագուներին, սակայն, ուզում եք հավատացեք, ուզում եք՝ ոչ, իմ ընտանիքում կա «Տոտտենհեմի» երկրպագու, և ես անձնական ոչինչ չունեմ այդ ակումբի դեմ: Դա պարզապես հաճույքի համար եմ արել,- Ուիլշերի խոսքերն է մեջբերում Sky Sports-ը:
