«Քուինս Պարկ Ռեյնջերսը» պաշտոնապես հայտնել է «Յուվենտուսի» կիսապաշտպան Մաուրիսիո Իսլային մեկ տարով վարձակալելու մասին:
Իսլան, ով Բրազիլիայում կայացած աշխարհի առաջնությունում մասնակցեց Չիլիի հավաքականի բոլոր չորս խաղերին, դարձավ այս ամառվա ընթացքում ՔՊՌ-ի արդեն չորրորդ նորեկը՝ Ռիո Ֆերդինանդից, Սթիվեն Կոլկերից և Ջորդան Մատչից հետո:
26-ամյա Իսլան ունիվերսալ ֆուտբոլիստ է, ով կարող է խաղալ ինչպես աջ պաշտպան, այնպես էլ կիսապաշտպանության ցանկացած դիրքում: Ինչպես հաղորդում է BBC-ն, լոնդոնյան ակումբն Իսլային հետագայում գնելու իրավունք է ստացել:
-Ես շատ ուրախ եմ այստեղ գտնվելու համար: Սա նոր փորձություն է ինձ համար: Բոլորն էլ գիտեն, որ Պրեմիեր Լիգան աշխարհի ուժեղագույն առաջնությունն է: Հուսով եմ, որ սա կլինի հիանալի մրցաշրջան և ինձ, և ակումբի համար,- ասել է Իսլան:
