Այսօր Լոնդոնի «Ուեմբլի» մարզադաշտում տեղի կունենա Անգլիայի սուպերգավաթի խաղարկությունը: Միմյանց հետ կմրցեն Անգլիայի գավաթակիր «Ուիգան Ատլետիկը» և Պրեմիեր Լիգայի չեմպիոն «Մանչեսթեր Յունայթեդը»:
Այս խաղով կմեկնարկի Հին Աշխարհի կարևորագույն ֆուտբոլային առաջնությունը: Երկրպագուները երկար ընդմիջումից հետո վերջապես հնարավորություն կունենան վայելելու գեղեցիկ և անզիջում պայքար: Այս դիմակայության գլխավոր առանձնահատկությունն այն է, որ «Յունայթեդը» 1986թ-ից հետո առաջին պաշտոնական խաղը կանցկացնի առանց Սէր Ալեքս Ֆերգյուսոնի: «Մանկունյանցիները» նախորդ մրցաշրջանում տարան 28 հաղթանակ, 5 խաղ ավարտեցին ոչ-ոքի արդյունքով և ընդամենը 5 խաղում զիջեցին մրցակցին, ինչի շնորհիվ էլ հռչակվեցին երկրի չեմպիոն:
Ի տարբերություն «Յունայթեդի», նրա մրցակից «Ուիգանի» համար նախորդ մրցաշրջանն անհաջող դասավորվեց: «Ուիգանը» Ռոբերտո Մարտինեսի գլխավորությամբ 20 խաղում պարտություն կրելով՝ զբաղեցրեց 18-րդ հորիզոնականը և հայտնվեց Չեմպիոնշիփում: Սակայն «Ուիգանը» հաջող հանդես եկավ Անգլիայի գավաթի խաղարկությունում և եզրափակչում անակնկալ հաղթանակ տարավ «Մանչեսթեր Սիթիի» նկատմամբ:
Հանդիպումը առանձնանում է նաև նրանով, որ երկու թիմերի մարզիչների համար էլ սա առաջին պաշտոնական հանդիպումն է իրենց նոր ակումբներում: «Յունայթեդի» ղեկին այժմ Դևիդ Մոյեսն է, իսկ նրա նախկին թիմ տեղափոխված Ռոբերտո Մարտինեսին «Ուիգանում» փոխարինել է Օուեն Քոյլը:
Ինչ վերաբերվում է վիճակագրությանը, ապա այն միանշանակ «Յունայթեդի» կողմն է: Ընդհանուր առմամբ այս ակումբները հանդիպել են 17 անգամ, որից 16-ում հաղթել են «մանկունյանցիները» և 1 խաղում հաջողությունը «Ուիգանի» կողմն է եղել:
Խաղը տեղի կունենա այսօր, Երևանի ժամանակով 17:00-ին:
Մրցավարներ․ Մարկ Կլատենբուրգ (Նյուքասլ Ափոն Թայմ), Մալարկի (Դեվոն), Լեջեր (Շեֆիլդ)
Մեր կանխատեսումը՝ 3:1
