Շոտլանդական «Սելթիկի» գլխավոր մարզիչ Բրենդան Ռոջերսի անունը կրկին շրջանառվում է Անգլիայի Պրեմիեր Լիգայի հնարավոր թափուր տեղերի հետ կապված։
Ռոջերսը ներկայումս իր երկրորդ մարզչական շրջանն է անցկացնում «Սելթիկում», սակայն 52-ամյա հյուսիսիռլանդացի մասնագետի պայմանագրի ժամկետը լրանում է ընթացիկ մրցաշրջանի ավարտին։
Չնայած նրան, որ Ռոջերսը դեռևս հնարավորություն ունի նոր պայմանագիր կնքել շոտլանդական ակումբի հետ, talkSPORT-ը փոխանցում է, որ եթե Բրենդանը որոշի հեռանալ, նրա համար առաջնահերթությունը կլինի Պրեմիեր Լիգա վերադառնալը։
Հիշեցնենք, որ նախկինում Ռոջերսը մարզել է Պրեմիեր Լիգայի այնպիսի թիմեր, ինչպիսիք են «Լիվերպուլը», «Լեսթերը» և «Սուոնսին»։ Մրցաշրջանի վերջում Անգլիայում իսկապես կարող են մի քանի հետաքրքիր թափուր տեղեր բացվել։
Մասնավորապես, մրցաշրջանի ավարտին են մոտենում «Քրիսթալ Փելասի» մարզիչ Օլիվեր Գլասների և «Ֆուլհեմի» մարզիչ Մարկու Սիլվայի պայմանագրերը։ Բացի այդ, հայտնի է, որ «Նոթինգհեմ Ֆորեսթի» սեփականատեր Եվանգելոս Մարինակիսը Ռոջերսի մեծ երկրպագուն է։
