«Սաութհեմպտոնը» պաշտոնապես հայտնեց «Ռոմայի» և Իտալիայի հավաքականի հարձակվող Պաբլո Օսվալդոյին ձեռք բերելու մասին:
Գործարքը գնահատվում է 18 մլն եվրո, իսկ ևս 2 մլն եվրոն կվճարվի որպես բոնուս: «Սեյնթ Մերիում» Օսվալդոն տարեկան 3 մլն եվրո կստանա:
Պաբլոն արդեն 4-ամյա պայմանագիր է կնքել «Սաութհեմպտոնի» հետ: Սա ակումբի համար տրանսֆերային նոր ռեկորդ է: Օսվալդոն ամառվա ընթացքում «Սաութհեմպտոնի» երրորդ ձեռքբերումն է:
27-ամյա Օսվալդոն Ա Սերիայի անցած մրցաշրջանում անցկացրել է 29 հանդիպում և դարձել է 16 գոլի հեղինակ: Իտալիայի հավաքականում Պաբլոն մասնակցել է 9 խաղի:
Պաբլոն վերջին երկու մրցաշրջանների ընթացքում հանդես է եկել «Ռոմայում»: Մինչ այդ նա խաղացել է «Ատալանտայում», «Լեչեում», «Ֆիորենտինայում», «Բոլոնիայում» և «Էսպանյոլում»: Ընդհանուր առմամբ իր կարիերայում նա անցկացրել է 232 խաղ և խփել է 79 գոլ:
Պաշտոնապես որպես «Սաութհեմպտոնի» ֆուտբոլիստ Օսվալդոն կներկայանա երկուշաբթի օրը: Նոր թիմի կազմում իր մեկնարկը նա կնշի շաբաթ օրը կայանալիք Պրեմիեր Լիգայի երկրորդ տուրում, երբ «Սաութհեմպտոնը» կհյուրընկալի «Սանդերլենդին»:
