«Նյուքասլի» գլխավոր մարզիչ Ալան Պարդյուն հայտնել է, որ իր թիմում չկա ոչ մի պառակտում:
Այս շաբաթ «կաչաղակների» ղեկավարությունը որոշեց արգելել The Telegraph պարբերականի աշխատանքը «Սեյտ Ջեյմս Պարկում», որը «Լիվերպուլի» հետ խաղից հետո հրապարակել էր թիմում ֆրանսիացի և այլազգ ֆուտբոլիստների միջև տարբերությունների մասին հոդված:
Թեմայի մասին խոսել է նաև Անգլիայի հավաքականի գլխավոր մարզչի օգնական Գարի Նևիլը՝ հայտնելով, որ ֆրանսիացի ֆուտբոլիստների գալուց հետո «Նյուքասլում» տարաձայնություններ են առաջացել: Սակայն Պարդյուն հերքում է բոլոր այդ լուրերը:
-Նևիլը երբևէ եղե՞լ է մարզիչ: Մեր հասցեին արված քննադատությունները անտեղին են: Մենք միասնական ենք և պատրաստվում ենք արդյունքի հասնել հաջորդ խաղում:
Այո, մենք ֆրանսիացի շատ ֆուտբոլիստներ ունենք և դրա հետ կապված որոշակի լեզվական խնդիրներ կան: Եթե մտածում եք, որ մեր ֆուտբոլիստներին չի անհանգստացնում ստեղծված իրավիճակը, ապա դա ուղղակի ծիծաղելի է:
Մեր ճակատագիրը միայն մեր ձեռքերում է: Մենք շատ չենք հեռու վտանգավոր գոտուց:
Ես անգամ չեմ նայում մյուս ակումբների արդյունքներին, որովհետև շատ կարևոր է կենտրոնանալ մեր խաղի վրա: Մենք պետք է ամեն ինչ անենք հաղթանակի հասնելու համար,- Պարդյուի խոսքերն է մեջբերում Sky Sports-ը:
Ավելացնենք, որ այս պահին «Նյուքասլը» զբաղեցնում է մրցաշարային աղյուսակի 17-րդ հորիզոնականը և ընդամենը 5 միավոր է բաժանում վտանգավոր գոտում գտնվող «Ուիգան Ատլետիկից»:
