«Չելսիի» հարձակվող Դիեգո Կոստան Անգլիայում իր առաջին ամսվա ընթացքում ճանաչվել է Պրեմիեր Լիգայի լավագույն ֆուտբոլիստ: Օգոստոս ամսվա լավագույն մարզիչը Գարի Մոնկն է՝ «Սուոնսի Սիթիից»:
Իսպանիայի ազգային հավաքականի ֆուտբոլիստը «կապույտների» կազմում մասնակցել է 3 խաղի՝ դառնալով 4 գոլի հեղինակ: Այս պահին հենց Կոստան է գլխավորում առաջնության ռմբարկուների ցուցակը: «Ազնվականներն» ունեն 100% արդյունավետություն՝ երեք խաղ – երեք հաղթանակ:
Երեք խաղում նույնքան հաղթանակ է տարել նաև «Սուոնսի Սիթին», որի գլխավոր մարզչին էլ բաժին հասավ ամսվա լավագույն մարզչի կոչումը: Հատկանշական է, որ այս մրցաշրջանն առաջինն է Մոնկի մարզչական կարիերայում:
Ավելացնենք, որ ամսվա լավագույն ֆուտբոլիստի թեկնածուների թվում էին նաև «Սուոնսիի» ֆուտբոլիստներ Գիլֆի Սիգուրդսոնը և Նաթան Դայերը, ինչպես նաև Դիեգո Կոստայի թիմակից Սեսկ Ֆաբրեգասը:
