«Լիվերպուլը» որոշել է բողոքարկել նախորդ շաբաթ օրը «Տոտտենհեմի» դեմ Պրեմիեր լիգայի խաղում իրենց կիսապաշտպան Կյորտիս Ջոնսի հեռացումը:
Ջոնսը խաղադաշտից հեռացվեց «Լիվերպուլի» 2-1 հաշվով պարտության 26-րդ րոպեին:
Սկզբում մրցավար Սայմոն Հուպերը Ջոնսին միայն դեղին քարտ ցույց տվեց «Տոտտենհեմի» կիսապաշտպան Իվ Բիսումայի նկատմամբ թույլ տված խախտման համար, սակայն VAR-ի մրցավար Դարեն Ինգլենդը հանդիպման գլխավոր մրցավարին հրավիրեց մոնիտորի մոտ և դրվագը դանդաղ շարժումով դիտելուց հետո քարտի գույնը փոխեց կարմիրի։
Հանդիպումից անմիջապես հետո «կարմիրների» գլխավոր մարզիչ Յուրգեն Կլոպն իր անհամաձայնություն հայտնեց Ջոնսի հեռացման վերաբերյալ՝ ասելով, որ Կյորտիսի գործողություններում դիտավորություն չկար։
Այժմ «Լիվերպուլը» որոշել է բողոքարկման միջոցով հայտնել իր անհամաձայնությունը, հայտնում է Sky Sports-ը։ «Կարմիրները» կպնդեն, որ 22 ամյա անգլիացին բավականաչափ շփվել է գնդակի հետ և ավելորդ ֆիզիկական ուժ չի կիրառել։
Եթե «Լիվերպուլի» բողոքարկումը մերժվի, Ջոնսը չի մասնակցի Պրեմիեր լիգայի «Բրայթոնի», «Էվերթոնի» և «Նոթինգհեմ Ֆորեստի» դեմ խաղերին։
