Չեմպիոնշիպը ներկայացնող «Հալլը» պայմանագիր է կնքել «Լիվերպուլի» եզրային հարձակվող Ֆաբիո Կարվալյոյի հետ մինչև 2023/24 մրցաշրջանի ավարտը։
Հիշեցնենք, որ Կարվալյոն այս մրցաշրջանի առաջին կեսը վարձավճարով անցկացրեց «ՌԲ Լեյպցիգում», որտեղ չստացավ բավարար խաղային պրակտիկա, ուստի հունվարի սկզբին Ֆաբիոն ժամանակից շուտ վերադարձավ «Լիվերպուլ»։
Կարվալյոն չմնաց «Լիվերպուլում» և այժմ կրկին վարձավճարով տեղափոխվում է այլ ակումբ: Շատ անգլիական ակումբներ, այդ թվում Պրեմիեր լիգան ներկայացնող ակումբներ, ցանկանում էին ձեռք բերել Ֆաբիոյին, սակայն «կարմիրների» և անձամբ խաղացողի ընտրությունը կանգ առավ «Հալլի» վրա։
Այս պահին «Հալլը» ընդամենը մեկ միավորով է հետ մնում Չեմպիոնշիպի փլեյ-օֆֆի գոտում գտնվող ակումբներից։ «Վագրերը» հույսը դնում են 21 ամյա պորտուգալացու վրա, ով կօգնի նրանց պայքարել ԱՊԼ բարձրանալու համար:
Կարվալյոն «Լիվերպուլի» կազմում ընդամենը 21 հանդիպում է անցկացրել 2022 թվականի ամռանը «Ֆուլհեմից» տեղափոխվելուց հետո, բայց Անգլիայի նախկին երիտասարդական հավաքականի ֆուտբոլիստի հետ մեծ հույսեր են կապում Էնֆիլդում:
