Պրեմիեր Լիգայի 5-րդ տուրի կենտրոնական հանդիպաումը տեղի կունենա «Սիթի օֆ Մանչեսթեր» մարզադաշտում, ուր միմյանց կհանդիպեն երկու սկզբունքային մրցակիցներ «Մանչեսթեր Սիթին» և «Մանչեսթեր Յունայթեդը»:
Թիմերի վերջին հանդիպումից հետո շատ բան է փոխվել: 26 տարի «Յունայթեդում» աշխատելուց հետո գլխավոր մարզչի պաշտոնեց հեռացել է Սէր Ալեքս Ֆերգյուսոնը և նրան փոխարինել է Դևիդ Մոյեսը, ով իր հետ «Յունայթեդ» է բերել իր նախկին թիմի առաջատար Մարուան Ֆելայնիին:
Մեծ փոփոխություններ են կատարվել նաև «Սիթիում»: «Քաղաքայինների» շարքերը համալրել են Ֆերնանդինյոն, Խոսուս Նավասը, Ալվարո Նեգրեդոն, Ստեֆան Յովետիչը, իսկ գլխավոր մարզչի պաշտոնում Ռոբերտո Մանչինիին փոխարինել է Մանուել Պելեգրինին:
Անկախ ամեն ինչից, այս երկու ակումբների դիմակայությունը հին աշխարհի ամենադիտարժան հանդիպումներից է: Թիմերը այս խաղին են մոտեցել Չեմպիոնների Լիգայի մեկնարկային խաղում վստահ հաղթանակներից հետո: «Կարմիր սատանաներն» «Օլդ Թրաֆորդում» 4:2 հաշվով առավելության հասան Լևերկուզենի «Բայերի» նկատմամբ, իսկ Պելեգրինիի սաները Չեխիայում 3 անպատասխան գնդակ ուղարկեցին երկրի չեմպիոն Պլզենի «Վիկտորիայի» դարպասը:
Ինչ վերաբերվում է միմյանց միջև անցկացրած հանդիպումների վիճակագրության, ապա առավելությունը «մանկունյանցիների» կողմն է: Թիմերն ընդհանուր առմամբ հանդիպել են 165 անգամ, որից 69 խաղում հաղթել է «Յունայթեդը», 50 խաղում գրանցվել է ոչ ոքի արդյունք և միայն 46 խաղում են ուժեղ գտնվել «Սիթիի» ֆուտբոլիստները:
Խաղը տեղի կունենա այսօր, Երևանի ժամանակով 19:00-ին:
Գլխավոր մրցավար՝ Հովարդ Վեբ:
Մեր կանխատեսումը՝ 2:2:
