«Լիվերպուլը» պաշտոնապես հայտնեց գլխավոր մարզչի պաշտոնում Յուրգեն Կլոպին նշանակելու մասին։
Օրեր առաջ «կարմիրները» խզեցին իրենց պայմանագիրը Բրենդան Ռոջերսի հետ, ում գլխավորությամբ թիմն անհաջող ավարտեց նախորդ մրցաշրջանը և նույն արդյունքներով մեկնարկեց ընթացիկը։ Դեռ հյուսիսիռլանդացուն հեռացնելուց առաջ խոսվում էր, որ Դորտմունդի «Բորուսիայի» նախկին մարզիչ Յուրգեն Կլոպը կարող է գլխավորել «Լիվերպուլը»։
Մերսիսայդյան ակումբը երկար ժամանակ առանց մարզչի չմնաց։ Այսօր գերմանացի մասնագետը երեք տարվա պայմանագիր ստորագրեց «Լիվերպուլի» հետ, որին կփորձի վերադարձնել Չեմպիոնների Լիգա։
