«Չելսին» ամռանը կերկարաձգի Ռոմելու Լուկակուի պայմանագիրը, եթե նրան վաճառելու համար լավ առաջարկ չստանա:
Երեք տարի առաջ «կապույտները» Լուկակուի համար «Անդերլեխտին» վճարեցին 18 մլն ֆունտ: Եվ չնայած որ այս ընթացքում Լուկակուն «Սթեմֆորդ Բրիջում» իրեն դրսևորելու շանսեր գործնականում չի ունեցել, սակայն «Վեստ Բրոմվիչում» և «Էվերթոնում» անցկացրած մրցաշրջանները բարձրացրել են նրա տրանսֆերային արժեքը:
Ինչպես հաղորդում է The Guradian-ը, «Չելսին» պատրաստ է վաճառել Լուկակուին, սակայն ոչ պակաս, քան 25 մլն ֆունտով: Բելգիացի հարձակվողի ծառայություններով հետաքրքրվում են «Էվերթոնը», «Տոտտենհեմը» և «Ատլետիկոն»:
Սակայն եթե «Չելսին», այնուամենայնիվ չկարողանա վաճառել Ռոմելուին, ապա կփորձի երկարաձգել վերջինիս պայմանագիրը, որը կլրանա հաջորդ ամռանը:
