Չեմպիոնների լիգայի խմբային փուլի երրորդ խաղում «Արսենալը» արտագնա խաղում կմրցի «Սևիլիայի» հետ։
Չեմպիոնների լիգայում սկսելով «ՊՍՎ»-ի նկատմամբ վստահ հաղթանակով՝ «Արսենալն» այնուհետև պարտվեց «Լենսին», որը ներկայումս չորս միավորով գլխավորում է B խումբը։
«Սևիլիան» խմբային փուլում ոչ-ոքի է խաղացել իր երկու առաջին հանդիպումներում, ուստի այժմ մեկ միավոր պակաս ունի «զինագործներից»:
«Արսենալը» Եվրոպական մրցաշարերում միայն մեկ անգամ է առճակատվել «Սևիլիայի» հետ՝ 2007/08 մրցաշրջանի Չեմպիոնների լիգայի խմբային փուլում,որտեղ «զինագործները» սեփական հարկի տակ հաղթեցին 3:0 հաշվով, իսկ Անդալուսիայում պարտվեցին 3:1 հաշվով:
«Սևիլիան» եվրոպական մրցաշարերում անգլիական թիմերի դեմ տնային վերջին 10 հանդիպումներից միայն երեքում է պարտվել (5 հաղթանակ, 2 ոչ-ոքի):
Հենց նախորդ մրցաշրջանում «Սևիլիան» դուրս թողեց «Մանչեսթեր Յունայթեդին» Եվրոպայի լիգայի քառորդ եզրափակիչից՝ տնային խաղում հաղթելով 3։0 հաշվով։
«Արսենալը» բոլոր մրցաշարերում հաղթել է իսպանական թիմերի դեմ արտագնա 17 խաղերից ընդամենը 3֊ում, ընդ որում վերջին հաղթանակը «Վալենսիայի» դեմ խաղում էր 2019 թվականին:
Որպես «Արսենալի» գլխավոր մարզիչ, Միկել Արտետան միայն մեկ հանդիպում է անցկացրել իր հայրենի Իսպանիայում՝ 2021 թվականին պարտվելով «Վիլյառեալին» 2:1 հաշվով:
Դարպասապահ Աարոն Ռեմսդեյլը, ով բաց թողեց «Չելսիի» դեմ հանդիպումը իր որդու ծննդյան պատճառով, կրկին հասանելի է, բայց սպասվում է, որ Դավիդ Ռայան կպահպանի իր տեղը մեկնարկային կազմում: «Արսենալի» միակ կորուստը պաշտպան Յուրիեն Թիմբերն է:
Չեմպիոնների լիգա՝ B խումբ 3-րդ տուր
«Սևիլիա» (Իսպանիա) – «Արսենալ» (Անգլիա)
Ռամոն Սանչես Պիսխուան՝ 23:00
