Պրեմիեր լիգայի խաղերի վիճահարույց դեպքերի ուսումնասիրող հանձնաժողովը որոշել է, որ Անտոնի Գորդանի խփած գոլի արձանագրումը «Արսենալի» դեմ խաղում ճիշտ է եղել։
Հիշենք, որ Գորդանի գոլը նախորդ տուրում արձանագրեց «Արսենալի» առաջին պարտությունը Պրեմիեր լիգայի այս մրցաշրջանում:
Գոլը, որը մեծ հիասթափություն պատճառեց «զինագործների» գլխավոր մարզիչ Միկել Արտետային, արձանագրվեց՝ չնայած այն կասկածներին, որ գնդակը փոխանցման ժամանակ դուրս էր եկել դաշտի սահմաններից, Ժոելինտոնը խախտել էր խաղի կանոնները Գաբրիելի նկատմամբ, իսկ Գորդանը գտնվում էր խաղից դուրս վիճակում:
Այնուամենայնիվ, հինգ հոգուց բաղկացած հանձնաժողովը որոշեց, որ դաշտի մրցավար Ստյուարտ Աթվելը և VAR-ի մրցավար Էնդի Մադլին առանց սխալի են վարվել Գորդանի գոլի դրվագում:
Ինչպես նշում է BBC-ն, հանձնաժողովը համապատասխան որոշումը կայացրել է քվեարկությամբ։ Չորսը կողմ էին, որ Գորդանի գոլը ճիշտ է արձանագրվել, և միայն մեկն էր դեմ։
Հանձնաժողովը նաև միաձայն որոշեց, որ Կայ Հավերցը պետք է առաջին խաղակեսում հեռացվեր խաղադաշտից՝ Շոն Լոնգստաֆի նկատմամբ խաղի կանոնները խախտելու համար:
