«Ֆուլհեմի» սեփականատեր Շահիդ Խանը մտածում է իր ակումբը վաճառելու և փոխարենը «Տոտտենհեմը» գնելու մասին:
Evening Standard-ի հաղորդմամբ, Խանի պլանները դեռ նախնական փուլում են: Այս պահին ամերիկացի գործարարը ոչ պաշտոնական քննարկումներ է ունենում և դեռ չի կապնվել «Տոտտենհեմի» հետ:
Այս շաբաթ «Տոտտենհեմը» որոշ մանրամասներ հայտնեց իր նոր՝ 61 հզր նստատեղանոց մարզադաշտի մասին, որը 2018 թվականին բացվելուց հետո 10 տարվա ընթացքում կընդունի ամերիկյան ֆուտբոլի խաղեր:
«Տոտտենհեմին» և ամերիկյան ֆուտբոլին կապող այս գործոնը հանդիսացել է Խանի հետաքրքրության պատճառը: Ինչպես գիտենք, Շահիդը նաև NFL-ի «Ջեկսոնվիլ Ջագուարս» ակումբի սեփականատերն է:
2011 թվականին, երբ Շահիդը նոր էր գնել «Ջագուարսը», այդ ակումբ ամենաքիչ շահույթ ապահովողն էր ազգային լիգայի 32 մասնակիցների մեջ: Սակայն շնորհիվ «Ուեմբլում» արտագնա խաղերի, «Ջեկսոնվիլը» կարողացավ շահութաբեր ակումբների աղյուսակում 10 քայլ վերև բարձրանալ:
Այժմ Խանը ցանկանում է «Տոտտենհեմի» նոր մարզադաշտը դարձնել մի վայր, որտեղ «Ջագուարսը» կկարողանա մշտապես անցկացնել իր խաղերը և ավելի շատ գումար վաստակել:
Ավելացնենք, որ Forbes-ը Խանի կարողությունը գնահատել է 3 մլրդ ֆունտ: «Տոտտենհեմը» Շահիդին կարող է անցնել մոտավոր 1 մլրդ ֆունտով, սակայն մեծ կասկածներ կան, որ Դանիել Լևին պատրաստ կլինի բաժանվել իր պաշտելի ակումբից:
