«Արսենալի» գլխավոր մարզիչ Արսեն Վենգերը չի ստորագրի նոր պայմանագիր ակումբի հետ մինչև այս մրցաշրջանի ավարտը: Այս մասին նա այսօր հայտնել է ակումբի ղեկավարությանը: Goal պարբերականի փախանցմամբ ֆրանսիացի մասնագետը սխալ է համարում նման հարցի քննարկումը այս պահին, երբ թիմն ունի խնդիրներ:
-Եթե դուք հարցնում եք ինձ իմ ապագայի մասին, ապա ես կտամ միայն մի պատասխան. ես հարգում եմ իմ պայմանագրերը,-ասել է նա:
63-ամյա մարզիչն ամենաբարձր վարձատրվող մասնագետներից է Պրեմիեր Լիգայում. նա զիջում է միայն Սէր Ալեքս Ֆերգյուսոնին: Չնայած որ 7 մրցաշրջան անընդմեջ թիմը ոչ մի տիտղոս չի նվաճում, «Արսենալի» ղեկավարությունը շարունակում է լիովին վստահել Վենգերին: Հենց նրա շնորհիվ է ակումբը տարեկան այսքան եկամուտ ստանում:
Հաջորդ ամառ Արսեն Վենգերը շատերի նման կհայտնվի այնպիսի իրավիճակում, երբ պայմանագրի լրանալուն մնացել է մեկ տարի և պետք է որոշում կայացնել: