«Արսենալի» գլխավոր մարզիչ Միկել Արտետան խոստացել է, որ կշարունակի խոսել Պրեմիեր լիգայի մրցավարության մասին՝ չնայած ՖԱ-ի մեղադրանքներին։
Հիշեցնենք, որ Արտետան մեղադրվում է նոյեմբերի 4-ին «Նյուքասլից» կրած 1:0 հաշվով պարտությունից հետո մրցավարներին վիրավորելու մեջ: Այժմ Միկելը որակազրկման սպառնալիքի առաջ է կանգնած։
Սակայն Արտետան խոստանում է, որ կշարունակի անկեղծ պատասխանել, երբ նրան խնդրեն գնահատել մրցավարների աշխատանքը։
«Ես պատրաստվում եմ շարունակել բարձրաձայնել իմ նկատած թերությունները: Կարծում եմ, որ դուք պետք է լինեք այն ինչ կաք: Որպես առաջնորդ, դուք պետք է լինեք իսկական: Դուք չեք կարող լինել մի բան, որը դուք չեք:
Մենք մեր դիտարկումներն ուղարկել ենք ՖԱ-ին և կփորձենք պաշտպանել մեր տեսակետներն ու պատճառները, թե ինչո՞ւ արեցինք այն, ինչ արեցինք: Այդ մասին շատ բան չեմ կարող ասել:
Երբ քեզ հարցնում են քո կարծիքը, դու պետք է ճիշտ ձևով արտահայտես այն, և դրա համար կա ընթացակարգ։
Լավ է, որ մենք փոխգործակցում ենք: Մենք բոլորս ցանկանում ենք բարելավել խաղը՝ մրցավարները, մարզիչները, պաշտոնյաները, մարզական տնօրենները, լրագրողները: Մենք բոլորս ցանկանում ենք խաղն ավելի լավը դարձնել:
Խաղն ավելի լավը դարձնելու համար մեզ անհրաժեշտ է խոսքի ազատություն, հարգանք և կառուցողական մոտեցում: Լավ է, որ մենք բոլորս խոսում ենք լրատվամիջոցների հետ որոշումների մասին, քանի որ դա հստակություն է տալիս» – Արտետայի խոսքերն է մեջբերում BBC-ն:
