«Ուիգանի» նկատմամբ տարած հաղթանակից հետո (1:0) «Մանչեսթեր Սիթիի» գլխավոր մարզիչ Ռոբերտո Մանչինին խոստովանել է, որ դժգոհ է պաշտպան Միկա Ռիչարդսի խաղից:
24-ամյա Ռիչարդսը երեկ առաջին անգամ էր դաշտ դուրս եկել՝ երկար ժամանակ ապաքինվելով ծնկի վնասվածքից: Մինչդեռ Միկան տպավորություն չթողեց, շատ սխալվեց և խաղի վերջում իսկապես հոգնել էր:
Հետխաղյա մամլո ասուլիսին Մանչինին չկաողացավ թաքցնել հիասթափությունը՝ միևնույն ժամանակ ակնարկելով, որ ուրախ է պաշտպանի վերադարձի համար:
-Նա դեռ շատ պետք է աշխատի: Ինձ դուր չեկավ նրա խաղը: Մտածում էի, որ նա իր լավագույն մարզավիճակում կլինի: Այնուամենայնիվ, երջանիկ եմ, որ նա վերադարձել է,- հայտնել է իտալացի մասնագետը:
Բացի այդ Ռոբերտոն արժանին է մատուցել մրցակցին:
-«Ուիգանն» արժանի չէ Պրեմիեր Լիգայից դուրս մնալուն: Նրանք այսօր լավ խաղ ցույց տվեցին և 65 րոպեների ընթացքում մեզնից լավն էին: Ռոբերտո Մարտինեսը հիանալի մասնագետ է, իսկ նրա թիմն այսօր ուղղակի հրաշալի գործեց,- ավելացրել է Մանչինին:
