«Չելսիի» գլխավոր մարզիչ Ժոզե Մոուրինյոն և «Մանչեսթեր Յունայթեդի» նախկին կիսապաշտպան Փոլ Սքոուլզը կարծում են, որ Ուեյն Ռունին Անգլիայի ազգային հավաքականում չի խաղում իր դիրքում:
Աշխարհի 2014թ-ի առաջնության մեկնարկային խաղում անգլիացիները պարտվեցին Իտալիայի հավաքականին (1:2): «Երեք առյուծների» միակ գոլը Դանիել Սթարիջը խփեց հենց Ռունիի փոխանցումից հետո: Մոուրինյոյի կարծիքով, Անգլիայի պարտության հիմնական պատճառն այն էր, որ 28-ամյա Ռունին ստիպված էր խաղալ որպես վինգեր:
-Ես չեմ կարծում, որ դա Ուեյնի համար լավագույն դիրքն էր: Ես կարծում եմ, որ ֆուտբոլիստները պետք է շատ անգամ իրենց զոհաբերեն հանուն թիմի, և Ուեյնն այդ գործում վատ չէր: Ակնհայտ էր, որ Ռոյը (Հոջսոնը) փորձում է խաղալ Ռունիի, Սթերլինգի, Ուելբեքի և Սթարիջի հետ միանգամից: Դրա համար պետք էր, որ մեկը խաղա եզրից և դա Ուեյնն էր:
Նա դարձավ գոլային փոխանցման հեղինակ և ակտիվ մասնակցություն ունեցավ խաղում: Սակայն նա իր ռմբարկուական հատկանիշներն ավելի լավ կդրսևորի, եթե խաղա կենտրոնում,- ասել է Մոուրինյոն: Eurosport
Այդ մտքի հետ համաձայն է նաև Սքոուլզը: Փոլը կարծում է, որ Ռունին պետք է լինի հավաքականի կենտրոնական հարձակվողը:
-Տեսեք աշխարհի առաջնության մյուս մասնակիցներին և նրանց ռմբարկուներին: Հոլանդիան Ռոբին վան Պերսիին օգտագործում է իր հարազատ դիրքում, Բրազիլիան Նեյմարին է թույլ տվել խաղալ այն դիրքում, որում ցանկանում է: Նույնը Արգետնիայում է Մեսսի դեպքում և Պորտուգալիայում՝ Ռոնալդուի:
Ես չեմ մեղադրում Ռունիին, սակայն նա իր դիրքում չէր: Չէ որ նա Անգլիայի հավաքականի լավագույն ռմբարկուն է,- ասել է Սքոուլզը: Daily Mirror
