Մինչև տարեվերջ «Արսենալը» նախատեսում է բանակցություններ սկսել իր կիսապաշտպան Գրանիտ Ջակայի հետ նոր պայմանագրի շուրջ։
2019 թվականին «Արսենալի» երկրպագուների հետ մեծ վիճաբանությունից հետո Ջական զրկվեց ավագի թևկապից և վտանգի ենթարկեց իր կարիերան լոնդոնյան ակումբում։
Այնուամենայնիվ, Միկել Արտետան, ով փոխարինեց Ունայ Էմերիին «զինագործների» ղեկին, համոզեց Գրանիտին չհեռանալ ակումբից, և շուտով շվեյցարացի ֆուտբոլիստը վերադարձավ իր նախկին ճանապարհին:
Այս մրցաշրջանում Ջական վերջապես վերականգնեց երկրպագուների վստահությունը իր հուսալի խաղով, որն օգնում է «Արսենալին» մնալ Պրեմիեր լիգայի վերնամասում։ Բացի այդ, Գրանիտը առաջնության ինը խաղերում դարձել է երկու գոլի և երկու գոլային փոխանցման հեղինակ:
Ջակայի գործող պայմանագիրն ավարտվում է 2024 թվականին, սակայն 2022 թվականին Քաթարում կայանալիք Աշխարհի առաջնությունից հետո «Արսենալը» պատրաստվում է 30-ամյա շվեյցարացուն հրավիրել բանակցությունների սեղանի շուրջ՝ քննարկելու նոր պայմանագիր, հայտնում է Football Insider-ը։
