«Էվերթոնի» դեմ խաղում ստացած վնասվածքը կարող է խանգարել կիսապաշտպան Ֆիլիպե Կոուտինյոյին այս տրանսֆերային պատուհանի ընթացքում հեռանալ «Աստոն Վիլլայից»:
Կիրակի օրը «Վիլլան» «Էվերթոնի» դեմ խաղում 4:0 հաշվով հաղթանակ տարավ։ Հենց այդ խաղում Կոուտինյոն հարկդրված փոխարինման կարիք ունեցավ: Ըստ լուրերի՝ Ֆիլիպեի մոտ ախտորոշվել է ծնկի խաչաձև կապանների վնասվածք։
Եթե այդ մտավախությունները հաստատվեն, «առյուծները» դժվար թե կարողանան վաճառել Կոուտինյոյին, ով, ըստ Ֆաբրիցիո Ռոմանոյի, հետաքրքրում է Սաուդյան Արաբիան ներկայացնող ակումբներին:
Բացի այդ, 2022 թվականի հոկտեմբերին Ունայ Էմերիի՝ «Վիլլայի» գլխավոր մարզչի պաշտոնում նշանակվելուց ի վեր, 31 ամյա բրազիլացին ընդամենը երկու հանդիպում է անցկացրել բիրմինգհեմյան թիմի մեկնարկային կազմում։
