«Քուինս Պարկ Ռեյնջերսի» գլխավոր մարզիչ Հարի Ռեդնապը հայտնել է, որ եթե իր ակումբը չբարելավի դիրքը մրցաշարային աղյուսակում, ապա իմաստ չի լինի նոր ֆուտբոլիստներ գնելու:
Շաբաթ կայացած խաղում Ռեդնապի սաները այդպես էլ չկարողացան հաղթել «Աստոն Վիլլային»: «Ռեյնջերները» շարունակում են մնալ մրցաշարային աղյուսակի վերջին հորիզոնականում:
Վերջին օրերին «ՔՊՌ»-ում ակտիվորեն խոսում էին Ջերմեյն Դեֆոյի, Դարեն Բենթի, Լոիկ Ռեմիի, Ջո Քոուլի մասին: Սակայն Հարին կարծում է, որ իմաստ չունի մասնակցել տրանսֆերային պատուհանին, եթե դուրս ես մնում Պրեմիեր Լիգայից:
-Եթե իրավիճակը չփոխվի, ապա ես խորհուրդ կտամ ակումբի ղեկավարներին ավելորդ գումարներ չվատնեն: Ինչ իմաստ ունի, եթե պետք է լքենք Պրեմիեր Լիգան,- ասել է Ռեդնապը: BBC
