«Նյուքասլի» եզրային հարձակվող Հարվի Բարնսն այս տարի չի խաղա ոտնաթաթի վնասվածքի պատճառով:
Անցած կիրակի 25 ամյա Բարնսը մեկնարկեց «Նյուքասլի» կազմում «Շեֆիլդ Յունայթեդի» դեմ խաղին, որն ավարտվեց «կաչաղակների» ջախջախիչ հաղթանակով 0-8 հաշվով։
«Նյուքասլի» մարզիչ Էդդի Հաուն հանդիպման 12-րդ րոպեյին ստիպված եղավ փոխարինել «Լեսթերից» 40 միլիոն ֆունտ ստերլինգով ձեռք բերած Բարնսին:
«Այո, մենք վախենում ենք, որ մենք կորցրել ենք նրան երկար ժամանակով: Դժվար է: Ես չեմ ուզում ժամկետներ սահմանել, քանի դեռ մասնագետից հաստատում չեմ ստացել, բայց կարծում եմ, որ դա կլինի ամիսներ»:
«Վնասվածքը վերաբերում է ոտնաթաթի մատից անմիջապես ներքև գտնվող հատվածին, կարծում եմ՝ սա շատ լուրջ վնասվածք է, նա արդեն հետազոտվել է, և հիմա սպասում ենք մասնագետի որոշմանը, թե ինչ անենք, արդյոք վիրահատություն է անհրաժեշտ»։
«Չեմ կարծում, որ դա բախում էր: Կարծում եմ, որ նա պարզապես վնասվեց վազելիս, ուստի դա շատ անսովոր վնասվածք է: Ես չեմ ուզում մանրամասնել, քանի որ ես բժշկական որակավորում չունեմ դա անելու համար, բայց այո, դա շատ անսովոր վնասվածք է»,- ասել է Հաուն:
TalkSPORT-ը պարզաբանում է, որ Բարնսը, հավանաբար, մինչև Նոր տարի ֆուտբոլի դաշտ դուրս չի գա։
Հավելենք, որ այս մրցաշրջանում Բարնսը «Նյուքասլի» կազմում անցկացրել է յոթ հանդիպում՝ դառնալով մեկ գոլի և մեկ գոլային փոխանցման հեղինակ։
