«Էվերթոնի» կիսապաշտպան Մարուալ Ֆելայնին հայտնել է, որ «Մանչեսթեր Յունայթեդի» գլխավոր մարզիչ Դևիդ Մոյեսը կարողանում է կոպիտ լինել խաղացողների հետ:
-Մոյեսը հիանալի մարզիչ է և արժանապատիվ մարդ, սակայն հավատացեք ինձ՝ նա կարող է շատ կոպիտ լինել: Եթե ցանկանում ես ստեղծել թիմ, որն ի վիճակի կլինի տիտղոսներ նվաճել, ապա պետք է այդպիսին լինելու կարողություն ունենաս: Ֆուտբոլն է այսպիսին: Իսկ Մոյեսը կարողանում է սարսափելի լինել:
Հիշում եմ՝ ինձ որակազրկել էին «Ստոկի» հետ խաղի ժամանակ, և մարզիչը բոլորին հանգիստ տվեց, բացի ինձնից: Ես պետք է ներկայանայի մարզումներին: Այնտեղ միայն ես և նա էինք, և դա հեշտ չէր:
Այս կերպ նա ցանկանում էր ինձ հասկացնել, որ թիմին վատ վիճակում եմ դրել և պետք է ուղղեմ սխալս իմ աշխատանքով: Ահա այդ իսկ պատճառով էլ նա հրաշալի մարզիչ է, նա գիտի, թե երբ պետք է կոպիտ լինել:
Այո, Մոյեսը խիստ է, սակայն լավ անձնավորություն է, լավ մասնագետ: Նա կարևոր դեր է խաղացել իմ կարիերայում: Միայն կարող եմ շնորհակալությունս հայտնել ամեն ինչի համար,- ասել է Մարուանը:
