«Արսենալի» վինգեր Ալեքս Օքսլեյդ-Չեմբերլենը հայտնել է, որ հավատում է Պրեմիեր Լիգայում իր թիմի հաղթանակին:
Պրեմիեր Լիգայի առաջին տուրում «Աստոն Վիլլայից» կրած պարտությունը «զինագործներին» չվհատեցրեց, և հաջորդ չորս հանդիպումները, որոնցից երկուսը Չեմպիոնների Լիգայի խաղեր էին, նրանք հաղթանակով ավարտեցին:
«Արսենալի» երկրպագուների լավատեսությունն ավելացավ կիսապաշտպան Մեսութ Օզիլին ձեռք բերելուց հետո: Եվ Օքսլեյդ-Չեմբերլենը, ով վնասվածք ունի, խոստովանել է, որ «Էմիրեյթսում» արդեն մտածում են չեմպիոնության մասին:
-Մենք հավակնել ենք չեմպիոնի կոչմանն այն ժամանակից, երբ ես տեղափոխվեցի «Արսենալ»: Կամ այն ժամանակ ուղղակի այդպիսի զգացողություն կար թիմում: Մենք իսկապես կարծում ենք, որ կարող ենք լինել առաջինը:
Այո, վերջին տարիներին մենք հաջողություններ չենք ունեցել: Սակայն անցած մրցաշրջանի վերջում արդյունավետ շատ խաղեր ցուցադրեցինք:
Թիմն ունի ոգի, որն անհնար է գնել: Մենք լավատես ենք, և ունենք այնպիսի թիմ, որի հետ կարող ենք հաջողության հասնել:
Մենք հավատում ենք, որ կարող ենք տիտղոս նվաճել: Ինչպես նաև կարծում ենք, որ կարող ենք ցանկացած տուրում հաղթանակ տանել: Եթե չեք հավատում դրան, նշանակում է, որ «Արսենալը» ձեր տեղը չէ,- Ալեքսի խոսքերն է մեջբերում Sky Sports-ը:
