Դարպասապահ Դավիդ Դե Խեան պնդում է, որ ինքն առաջվա պես «Մանչեսթեր Յունայթեդի» համար առաջինն է, չնայած այն շշուկներին, որ նա հեռանում է ակումբից:
Այս շաբաթվա սկզբին մի շարք պարբերականներ տարածեցին տեղեկություն այն մասին, որ «Յունայթեդի» գլխավոր մարզիչ Սէր Ալեքս Ֆերգյուսոնը ցանկանում է հաջորդ ամառ հրաժարվել Դե Խեայից: Ըստ ԶԼՄ-ների՝ Սէր Ալեքսը պարզապես հոգնել է Դավիդի սխալներից, որոնք ուղղակիորեն ազդում են արդյունքների վրա:
Անձամբ Դե Խեան այս բամբասանքներին ուշադրություն չի դարձնում և նույնիսկ խոստովանել է, որ վստահություն է ձեռք բերել խաղային կանոնավոր պրակտիկայի շնորհիվ: Վերջին ժամանակներս «մանկունյանցիների» մարզչական շտաբը չի դիմում դարպասապահների ռոտացիայի (Անդերս Լինդեգորն ավելի հաճախ մնում է պահեստայինների նստարանին): Սա իսպանացու կարծիքով իր օգտին է:
-«Յունայթեդ» տեղափոխվելու պահից սկսած ես ինձ համարել եմ համար մեկը: Իհարկե, ճիշտ է այդ հարցը տալ գլխավոր մարզչին: Նա փոխարինում է մեզ, երբ զգում է, որ դա ավելի լավ կլինի ակումբի համար:
Մինչդեռ ակնհայտ է, որ խաղային կանոնավոր պրակտիկան ինձ օգուտ է տալիս: Դարպասապահի համար միշտ էլ շատ կարևոր է, որպեսզի տեղ ունենա թիմի հիմնական կազմում: Սա բարձրացնում է վստահությունն ինքդ քո նկատմամբ,- հայտնել է Դե Խեան: ESPN
