Համաձայն Deloitte աուդիտորական ընկերության ուսումնասիրությանը, 2011/2012 մրցաշրջանում Անգլիայի Պրեմիեր Լիգայի ակումբները միասին վաստակել են ռեկորդային 2.36 մլրդ ֆունտ:
Deloitte-ի փորձագետները 2012/13 մրցաշրջանի համար կանխատեսել են 2.5 մլրդ ֆունտ, իսկ հաջորդ երեք տարվա համար կտրուկ 600 մլն ֆունտի աճ, ինչը կապված է հեռուստացուցադրման նոր պայմանագրի ստորագրման հետ: Այդ պարագայում գումարը կանցնի 3 մլրդ ֆունտից:
Փորձագետների կարծիքով, անգլիական ակումբների շահույթի ավելացմամբ կարելի է մեծածավալ և հեռանկարային աշխատանքներ կատարել: Մյուս ազգային առաջնություններն այս ցուցանիշով շատ հետ են Պրեմիեր Լիգայից:
Համեմատության համար, 2011/12 մրցաշրջանում Բունդեսլիգայի ակումբների շահույթը կազմել է 1.9 մլրդ ֆունտ, իսպանական Պրիմերայինը՝ 1.8 մլրդ, Ա Սերիայինը՝ 1.6 մլրդ, Լիգա 1-ինը՝ 1.1 մլրդ:
Նշենք, որ այդ հասույթի 70%-ը ծախսվում է աշխատավարձերի վրա: Բունդեսլիգայում այս տոկոսը ավելի ցածր է՝ 51, Պրիմերայում՝ 60, Ա Սերիայում՝ 75, Լիգա 1-ում՝ 74:
Ավելացնենք, որ Պրեմիեր Լիգայի ակումբներից 2011/12 մրցաշրջանում ամենից շատ շահույթ ունեցել է «Մանչեսթեր Յունայթեդը»՝ 320 մլն ֆունտ, իսկ ամենից քիչ՝ «Ուիգան Ատլետիկը»՝ 53 մլն ֆունտ:
