«Սուիդոն Թաունի» դեմ Լիգայի գավաթի 3-րդ փուլի խաղում «Չելսիի» գլխավոր մարզիչ Ժոզե Մոուրինյոն խաղային պրակտիկայի հնարավորություն կտա թիմի պահեստային ֆուտբոլիստներին: Այս մասին հաղորդում է The Guardian-ը:
Նախորդ շաբաթը ոչ հաջող ստացվեց «Չելսիի» համար: Չեմպիոնների Լիգայում «ազնվականները» տանը պարտվեցին «Բազելին», որից հետո Պրեմիեր Լիգայում հաղթական, բայց ոչ այնքան լավ խաղ անցկացրին «Ֆուլհեմի» հետ:
Անգլիայի երրորդ դիվիզիոնում հանդես եկող «Սուիդոնի» դեմ խաղում Մոուրինյոն պատրաստվում է դաշտ դուրս բերել այն ֆուտբոլիստներին, որոնք ընթացիկ մրցաշրջանում շատ քիչ են դաշտ դուրս եկել:
Առաջին հերթին խոսքը գնում Խուան Մատայի մասին: Սպասվում է նաև, որ դաշտում կլինեն Դավիդ Լուիզը, Սեզար Ասպիլիկուետան, Ռայան Բերտրանը, Մայքլ Էսսիենը և Վիլլիանը: «Կապույտների» դարպասում կարող է լինել Մարկ Շվարցերը:
-Իհարկե ես մի քանի փոփոխություններ կկատարեմ: Լավ կլինի, որ «Սուիդոնի» դեմ խաղան այն ֆուտբոլիստները, ովքեր ապացուցելու բան ունեն: Այդպես նրանք վստահություն ձեռք կբերեն,- ասել է Մոուրինյոն:
