Ֆոլարին Բալոգանը «Արսենալի» հիմնական թիմից առանձին է մարզվում, ինչը կարող է վկայել հարձակվողի մոտալուտ տեղափոխության մասին:
«Արսենալն» արդեն ծախսել է մոտ 200 միլիոն ֆունտ այս ամառ տրանսֆերների վրա՝ ձեռք բերելով Դեքլան Ռայսին, Կայ Հավերցին և Յուրիեն Թիմբերին: Ուստի այս պահին «զինագործները» կենտրոնացած են ֆուտբոլիստներ վաճառելու վրա։
«Արսենալի» ամենաթանկարժեք ակտիվներից մեկը, որը հասանելի է տրանսֆերի համար, 22 ամյա Բալոգանն է, ով «Ռեյմսում» վարձակալական մրցաշրջանում խփել է 21 գոլ: «Զինագործները» Ֆոլարինի համար սահմանել են 50 միլիոն ֆունտ ստերլինգ գինը:
Բալոգանը խաղացել է MLS-ի բոլոր աստղերի թիմի հետ նախամրցաշրջանային խաղում, սակայն շաբաթ օրը «Մանչեսթեր Յունայթեդի» դեմ խաղում լինելով փոխարինողների նստարանին՝ չմտավ խաղադաշտ:
Իսկ երկուշաբթի օրը Բալոգանը լիովին սահմանափակվել է անհատական մարզումներով Լոս Անջելեսում անձնական մարզչի հսկողության ներքո, հայտնում է The Athletic-ը։
Ըստ երևույթին, ամերիկացի ֆուտբոլիստը, ում ծառայություններով հետաքրքրված է «Ինտերը», «Միլանը», «Մոնակոն» և «Մարսելը», ավելի ու ավելի մոտ է «Արսենալից» հեռանալուն:
