«Մանչեսթեր Յունայթեդի» հարձակվող Ուեյն Ռունին, ով երեկ բաց է թողել «Շախտյորի» դեմ Չեմպիոնների Լիգայի խաղը, պետք է վերականգնվի մինչև շաբաթ օրը կայանալիք «Սանդերլենդի» դեմ Պրեմիեր Լիգայի խաղը:
Դոնեցկում տեղի ունեցած հանդիպման ժամանակ (1:1) Ռունին անսպասելիորեն չհայտնվեց «կարմիր սատանաների» կազմում, և նրա բացակայությունը միանգամից մտավախություն առաջացրեց ոչ միայն «Յունայթեդի», այլև Անգլիայի հավաքականի մոտ, որը շուտով պետք է խաղա Լեհաստանի և Չեռնոգորիայի հավաքականների դեմ:
Սակայն, «Յունայթեդի» գլխավոր մարզիչ Դևիդ Մոյեսն հայտնել է, որ այդ մտավախություններն անտեղի են: Չնայած նրա, որ Ուեյնը հարված է ստացել մարզման ժամանակ, մինչև շաբաթ օրը կայանալիք խաղը նա կվերականգնվի:
-Լուրջ բան չկա: Ուղղակի նրա սրունքն ուռել է Դենիել Ուելբեքի հետ բախվելու ժամանակ: Ես հույս ունեմ, որ նա կապաքինվի մինչև հաջորդ խաղը,- Մոյեսի խոսքերն է մեջբերում Sky Sports-ը:
