«Մանչեսթեր Սիթին» պաշտոնական առաջարկ է արել «Վեստ Հեմի» և Անգլիայի հավաքականի կիսապաշտպան Դեքլան Ռայսին ձեռք բերելու համար:
Երկուշաբթի օրը «Սիթին» հաստատեց Իլկայ Գյունդողանի հետ համագործակցության ավարտի մասին, ով յոթ տարի ակումբում աշխատելուց հետո ազատ գործակալի իրավունքով տեղափոխվեց «Բարսելոնա»:
Ըստ The Athletic-ի, այդ երեկո, «Սիթին» ուղարկել է իր առաջարկը 24 ամյա Ռայսի համար, որը նախատեսում է 80 միլիոն ֆունտ ստերլինգ փոխհատուցում, գումարած 10 միլիոն ֆունտ բոնուսների տեսքով:
«Վեստ Հեմը» նախկինում մերժել էր «Արսենալի» կատարած երկու առաջարկները։ «Զինագործները» պատրաստ էին ծախսել նույն 90 միլիոն ֆունտը Դեքլանին ձեռք բերելու համար, բայց նրանք պատրաստ էին 15 միլիոն ֆունտը վճարել բոնուսների միջոցով:
«Վեստ Հեմը» ցանկանում է ավելի քան 100 միլիոն ֆունտ ստերլինգ Ռայսի համար։ Նշվում է, որ Դեքլանը մեծ ցանկություն ունի իր ուժերը փորձել ավելի մեծ ակումբում:
Նախ, Ռայսը մերժեց նոր պայմանագրի առաջարկը, իսկ նրա գործող պայմանագրի ժամկետը լրանում է հաջորդ ամառ, թեև այն ունի 12 ամսով երկարաձգման տարբերակ: Երկրորդ, Կոնֆերանց լիգայի եզրափակիչում հաղթելուց հետո «Վեստ Հեմի» նախագահ Դևիդ Սալիվանը հաստատեց, որ Դեքլանը ցանկանում է հեռանալ ակումբից, և որ ակումբը պատրաստ է բավարարել այդ ցանկությունը:
«Սիթին» պետք է բանակցի ոչ միայն «Վեստ Հեմի», այլև անձամբ Ռայսի հետ, քանի որ այս պահին Դեքլանն առաջնահերթություն է տալիս «Արսենալին»։
