«Տոտտենհեմի» հարձակվող Հարի Քեյնը և «Մանչեսթեր Սիթիի» գլխավոր մարզիչ Պեպ Գվարդիոլան ճանաչվել են Պրեմիեր Լիգայի դեկտեմբեր ամսվա լավագույն ֆուտբոլիստ և լավագույն մարզիչ, համապատասխանաբար։
Նախորդ ամիս Քեյնը ռմբարկուների ցուցակում բարձրացավ առաջին հորիզոնական։ Հարին դարձավ ութ գոլի հեղինակ, այդ թվում՝ երկու հեթ-տրիկ «Բերնլիի» և «Սաութհեմպտոնի» դեմ խաղերում։
Դեկտեմբերը բավական հաջող ամիս էր նաև «Սիթիի» և անձամբ Գվարդիոլայի համար։ Նրա սաները միավոր կորցրին միայն «Կրիստալ Փելեսի» դեմ խաղում՝ 21 հնարավորից հավաքելով 19 միավոր։
Այս պարագայում, Պեպը Պրեմիեր Լիգայի ռեկորդ սահմանեց՝ ամսվա լավագույն մարզչի մրցանակը ստանալով չորրորդ անընդմեջ անգամ։ Սեպտեմբերից մինչև դեկտեմբեր այս պատվավոր մրցանակը բաժին է հասել միայն Գվարդիոլային։
Ամսվա լավագույն գոլի հեղինակը «Բորնմուտի» հարձակվող Ջերմեյն Դեֆոն է՝ «Կրիստալ Փելեսի» դարպասը խփած գոլով։
