«Արսենալի» կիսապաշտպան Միկել Արտետան կարծում է, որ իր թիմն ուղղակի անընդունելի է հանդես գալիս ընթացիկ մրցաշրջանում և ամռանը համալրման կարիք ունի:
«Զինագործներին» ոչ մի կերպ չի հաջողվում տեղ զբաղեցնել Պրեմիեր Լիգայի լավագույն քառյակում: Բացի այդ սպասվում է, որ չորեքշբաթի օրը թիմը դուրս կմնա Չեմպիոնների Լիգայի հետագա պայքարից:
-Մինչև մրցաշրջանի ավարտը մնում է 10 հանդիպում, իսկ մենք առաջատարին զիջում ենք 24 միավորով: Անհնար է հասնել առաջատարին, իսկ դա անընդունելի է:
Մենք չենք կարող լինել այսպիսի իրավիճակում, քանի որ լավագույն բազային կառուցվածքն ունենք: Հիանալի փիլիսոփայություն, լավ խաղացողներ, ֆինանսական աջակցություն, անհավատալի ամբոխ մարզադաշտում: Պետք է առաջ գնալ:
Մեզ համար կարևոր է Չեմպիոնների Լիգայի ուղեգիր նվաճելը: Ցանկացած թոփ ակումբ ջանում է ուժեղացնել կազմը: Հաջորդ մրցաշրջանում ցանկանում ենք ավելի լավ հանդես գալ, հավաքել ավելի շատ միավորներ, իսկ դա նշանակում է ավելի շատ հաղթանակներ տոնել: Կարծում եմ՝ ղեկավարությունն այդ մասին գիտի և ամռանն ինչ-որ բան կձեռնարկի,- հայտնել է Արտետան Daily Mail-ին տված հարցազրույցի ժամանակ:
